Contac
Contat
Chir

FAQ (Noziuns desvalies)

  • 1. Ci epa l'energia eletrica

    Al é la forma de energia plü comota che an pó adoré da fá döt: löm, cialt, frëit, mëte a jí motors y de vigni sort de aparac. Ara se lascia trasporté saurí, ara ne pësa nia y vá dër debota, mo ara é ria da controlé deache ara mëss gní fata tl medem momënt che ara vëgn adorada (ara ne vá nia saurí da la imagaziné te de gran cuantités). Ara vëgn fata tla gran pert cun generadus mená da turbines. Chëstes adora petröre o presciun dl'ega (idroeletrich) o gas o ince forza atomica. N’ atra manira moderna de produziun d’energia é le fotovoltaich olache an ne adora degun generadú che roda, mo panei solars y invertidus statics (nia che se möi) che la trasformëia por la rëi.

  • 2. Ci epa n Kilowatt (kW)

    Chësta é la potënza; por l'eletrizité depëndera dal produt dla tenjiun (V) y dl strom (A). Tles ciases d'abitaziun unse normalmënter potënzes danter 1,5 y 10 kW. Na mascin da lavé adora p.ej. ca. 2 kW, na televijiun o n computer ca. 200 W, n frigo ca. 400 W y i.i. 

  • 3. Ci epa na Kilowatt ora (kWh)

    Al é l'unité de mosöra dl'energia. Ara se trata dl’unité de mosöra plü importanta y che vëgn dant le plü gonot. Cun na kWh ponse scialdé 86 litri de ega a 10 degrés C°. Na mascin da 3 kW consüma te 5 ores 15 kWh (3 x 5). Na familia mesana cunsüma te n ann ca. 3500 kWh.

  • 4. Ci epa n Volt (V)

    Al ó dí la tenjiun dla forza eletrica, sciöche la presciun pro l'ega.
    Tles ciases unse 230 V o 400 V cun les trëi fases por i motors.

  • 5. Ci epa n Ampere (A)

    Al ó di tan de strom (eletrons) che passa fora por i aparac.
    Tles ciases de abitaziun unse normalmënter danter 6 y 32 A.

  • 6. Ci poi pa fa por sparagné energia eletrica

    Pro l’iluminaziun

    • Destudé les löms canche an ne les adora nia.
    • Baraté fora i pirns a incandescënza cun löms a consum bas (cina le 70% demanco) y dal medem atach. Ares costa deplü, mo ares tëgn 8 iadi tan dî. Al é damí püces de gran löms co tröpes de piceres.
    • Te locai de passaje y toiletes istalé sensurs che impëia la löm ma canche al é porsones dailó.
    • Puzené regolarmënter les löms y i taís dala löm da föm y stöp, che diminuësc le lominus cina jö al 20% dl normal (se recordé da destudé la löm tratan chësc laûr).



    Consëis generai por adorè damí i aparać y les mascins de ćiasa

    Canche an cumpra o barata fora n aparat eletrich, desson n chiri fora un cun le consum plü bas (tlassa A söl’ etichëta). Al costa n pü’ de plü, mo cun ci che an sparagna de energia, él tosc despaié jö.
    Adoré poscibilmënter les mascins tratan les ores de nöt o de sabeda, canche al é plü energia a desposiziun. Al gnará tosc na tarifa plü bassa por chëstes ores.


    Le frigo y la dlaciara

    • Posizioné l’aparat te locai nia massa stlüc y lascé almanco 10 cm danter le parëi y l’aparat. I mëte dalunc da fontanes de cialt (forní o finestres).
    • Evité da lascé la porta dl aparat daverta plü dî co nezesciar y le destaché fora sce al resta plü dî öt.
    • Regolé le termostat dl frigo/dlaciara sön temperatöres mesanes. Temperatöres massa basses ne é nia damí por la conservaziun di alimënc, mo costa tröpa energia.
    • Nia mëte ite spëisa cialda, che gaujëia broja.
    • Controlé, y sce al ó ester, baraté fora les guarniziun dla porta.
    • Puzené le radiadú ia do l’aparat, por che le cialt vëgnes dé jö bun al ambiënt inciaria.
    • Tó demez regolarmënter la broja. Sura i 5 mm de broja fej da isolant y le consum é cotan plü alt.



    La mascin da lavè

    • Ciaré da lavé guant ma cun la mascin plëna o scenó druché le botun de mesa plëna.
    • Ciaré da lavé cun temperatöres nia dër altes, deache i detersifs é atifs bele a temperatöres basses. Lavé a 90° rovina deplü le guant. Propi scialdé l’ega consüma le plü.
    • Adoré n produt cuntra la cialc, che incrosta sö la resistënza che scialda l’ega. La mascin perd insciö l’efiziënza y tëgn püch dî.
    • Les mascins che assüia le guant consüma tan de strom co da le lavé, porchël él gonot damí nia les adoré.




    La mascin da lavè jö

    • Mëte a jí la mascin poscibilmënter pormó canche ara é plëna
    • Sporfogne le patüc dananco les mëte te mascin, por che le filter ne se impifes nia y la mascin laores plü indortöra.
    • Ciaré da lavé a temperatöres dl’ega basses sce al é meso.
    • Sce al é poscibl ne desson nia ti fá assuié le patüc ala mascin, deache chësc adora tröpa energia.
    • Adoré val’ cuntra la cialc adöm cun le detersif, por che la mascin ne se incrostes nia sö.
    • Destaché fora le cabl dla mascin sce ara ne vëgn dî alalungia nia adorada.



    Le boiler electrich

    • Istalé n boiler dla dërta mosöra aladô ch’an l'adora.
    • Destaché le boiler sce al ne vëgn nia adoré ega cialda por plü dî.
    • Regolé le termostat sön temperatöres nia sura i 55°C, deache scenó aumënta cotan la pordüda de cialt tl boiler y ti ros.
    • Le boiler ne dess nia ester dër dalunc dal post olache an adora l’ega cialda, deache i ros lunc perd tröp cialt.



    L'implant de aria condizionada

    • Tëne ite na temperatöra nia plü alta co 5° C sot a chëra alaleria, deache ince ma püc degrés demanco arbassa bele l’umidité y an se stá damí.
    • Fá a na manira che i locai ne se scialdes nia massa ia por le de, stlüjon les finestres o tiran ca les coltrines. De nöt dessun lascé trá fora de ciasa l'aria cialda.



    La televijiun, le computer y i atri aparac eletronics:

    • Destudé i aparac daldöt canche ai ne vëgn nia adorá, deache ai adora ince en stand-by ciamó cotan de strom (televijiun, stereo, computer, stampanta ec.)
    • Pro le computer desson ativé la funziun de sparagn de energia, por ejëmpl destodé da su le monitor do da n cer tëmp che an ne l'adora nia
    • Nia miné che destodé y i mëte a jí rovines i aparac. Demanco che ai é en funziun y plü dî che ai tëgn.
  • 7. Co popa mia ciasa gní colegada al'internet?

    Tres la fira otica che é al mumënt discponibla ti zëntri di paisc y tles zones artijianales o tres n'antëna che é indlunch y da atira discponibla.

  • 8. Co calcolëiunpa la velozité de download?

    Sce te as na conesciun de 30 Mbit/secund ne ol sanbëgn nia dí che la velozité da desciarié é de 30 Megabyte. Por ciafé fora la velozité effetiva messëis fa na divijiun por 8 che o dí: 30 Mbit/s : 8 = 3,75 Megabyte/s.

    Insciö é la velozité da desciaré de 3,75 Megabyte/s.