Inauguraziun dla nöia sënta
Ai 27. de aurí 2024 n gauja dla reuniun generala di mëmbri el gnü inaodé la sënta nöia tla zona artejanala a Piculin. Siur Klaus Sottsas á dé la benedisciun de Dî y dedô á l’ombolt Giorgio Costabiei y l’presidënt Martin Clara taié la vëta. La cooperativa á podü realisé n frabicat nü por les ativites de destribuziun y venüda de energia eletrica, energia termica, telescialdamënt y internet asvelt dô bëgn 22 agn de sorvisc.
Da pert dl’acunsiadú Pire Unterweger ele gnü porté dant le svilup dl proiet y l’presidënt á rengrazié les dites y düc chi che á contribuí al bun garaté di laurs, dandadöt i colauradus Oskar, Michael y Giovanni. La strotöra á na cubatöra 2.060 m², cun 180 m² de magasin y 134 m² de ufizi y á costé € 1.100.000. Deache ara vëgn scialdada da na pumpa dal cialt da 24 kW, alimentada da n implant fotovoltaich da 38 kW é la costruziun energeticamënter passiva, sënza debojëgn de energia esterna. Por recordé la gran rogossia dl 5 de agost 2022, che á fat de gran danns, ele gnü metü sö dan l’entrada na scina de n punt da Lungiarü, storta decá de morvëia dales forzes dla natüra.
La festa é jöda inant cun n bun buffet y abelida da na cornisc musicala cun Ossi.